CCJAP - Detail News

ដំណឹងផ្សេងៗ

សន្និបាត ស្តីពីអ្នកគ្រប់គ្រងប្រព័ន្ធអប់រំកែប្រែនៅតំបន់អាស៊ីប៉ាស៊ីហ្វិក

សន្និបាតលើកទី២៨ ស្តីពីអ្នកគ្រប់គ្រងប្រព័ន្ធអប់រំកែប្រែនៅតំបន់អាស៊ីប៉ាស៊ីហ្វិកបានរៀបចំនៅ កោះឡាំងកាវី ប្រទេសម៉ាឡេស៊ី ចាប់ពីថ្ងៃទី ២៣ដល់ថ្ងៃទី២៨ ខែវិច្ឆិកា ឆ្នាំ២០០៨។ គណៈប្រតិភូរបស់ប្រទេសកម្ពុជាដឹកនាំដោយឯកឧត្តម ឧត្តមសេនីយ៍ឯក ហេង ហាក់ អគ្គនាយកនៃអគ្គនាយកដ្ឋានពន្ធនាគារបានចូលរួមក្នុងសន្និបាតនេះហើយព្រមទាំងធ្វើកំណត់បង្ហាញលើប្រធានបទចំនួន២។

អង្គសន្និបាតបានលើកយករបៀបវារៈចំនួន៤មកពិភាក្សាក្រោមប្រធានបទ (រួបរួមគ្នា)

របាយការណ៍ថ្នាក់ជាតិស្តីពីវិស័យពន្ធនាគារបច្ចុប្បន្ន
តុល្យភាពរវាងការគ្រប់គ្រងពន្ធាគារ ជាមួយការកើនឡើងនូវការត្រួតពិនិត្យពន្ធនាគារពីស្ថាប័នខាងក្រៅ
ការអនុវត្តន៍ល្អក្នុងការស្តានីតិសម្បទាសំរាប់អ្នកទោសស្ត្រី និងក្រុមអ្នកទោសពិសេសដ៏ទៃទៀត
ទំនាក់ទំនងគ្រួសារ និងសហគមន៍ក្នុងដំណើរការស្តានីតិសម្បទា

ប្រទេសដែលចូលរួមទាំងអស់បានផ្តល់ជាឯកសារនិងធ្វើកំណត់បង្ហាញលើរបៀបវារៈទី១ ហើយអគ្គនាយកដ្ឋានពន្ធនាគារបានធ្វើកំណត់បង្ហាញលើរបៀបវារៈទី៣ ដោយផ្តោតលើបញ្ហាអ្នកទោសស្ត្រី។ ប្រធានបទ(រួបរួមគ្នា)នេះគឺដើម្បីអោយអ្នកចូលរួមទាំងអស់ពិចារណាពីប្រសិទ្ធភាពនៃសកម្មភាពសមាហរណកម្មនិងស្តានីតិសម្បទាសំរាប់ទណ្ឌិត ដើម្បីកុំអោយប្រព្រឹត្តបទល្មើសបន្តទៀតនិងដើម្បីចូលរួមចំណែកដល់សុវត្ថិភាពសហគមន៍។

មានប្រទេសចំនួន២៥នៅក្នុងតំបន់អាស៊ីប៉ាស៊ីហ្វិក បានចូលរួមក្នុងសន្និបាតនេះ ដោយមានគណៈប្រតិភូជាង២០០ នាក់។ សន្និបាតនេះគឺជាវេទិការមួយដែលផ្តល់ឱកាសអោយថ្នាក់ដឹកនាំនិងមន្ត្រីឯកទេសក្នុងវិស័យពន្ធនាគារនៅក្នុងតំបន់អាស៊ីនិងប៉ាស៊ីហ្វិកបានមកជួបពិភាក្សានិងចែករំលែកបទពិសោធន៍គ្នាទៅវិញទៅមក។ គណៈប្រតិភូក៏បានទៅទស្សនៈសិក្សាតាមបណ្តាពន្ធនាគារនៅក្នុងប្រទេសម៉ាឡេស៊ី ដើម្បីពិនិត្យជាក់ស្តែងលើការងារគ្រប់គ្រងពន្ធនាគារ និងផ្លាស់ប្តូរយោបល់ស្វែងរកដំណោះស្រាយសមស្របសំរាប់ការអភិវឌ្ឍន៍ពន្ធនាគារអោយមាន បទដ្ឋានឆ្លើយតបទៅនឹងគោលការណ៍អនុវត្តអន្តរជាតិនិងក្នុងតំបន់។

សន្និបាតប្រភេទនេះគឺត្រូវបានរៀបចំជារៀងរាល់ឆ្នាំ ហើយអគ្គនាយកដ្ឋានពន្ធនាគារបានចូលរួមសន្និបាតតាំងពីឆ្នាំ១៩៩៨ ព្រមទាំងបង្កើតនូវបណ្តាញនិងទំនាក់ទំនងល្អជាមួយផ្នែកអប់រំកែប្រែនៅក្នុងតំបន់អាស៊ីប៉ាស៊ីហ្វិក។

បទពិសោធន៍ដែលបានពីសន្និបាតកន្លងមក ត្រូវបានយកមកប្រើប្រាស់ក្នុងកំណែទម្រង់ពន្ធនាគារ ដោយផ្តោតជាពិសេសទៅលើការរៀបចំបទដ្ឋានថ្មី និងសន្តិសុខ។